Ku gicamunsi cyo kuri uyu wa Kane tariki 21 Gicurasi 2026, Umuyobozi w’Akarere Bwana Rangira Bruno, ari kumwe n’abandi bayobozi, abagize inama y’umutekano itaguye y’Akarere, n'Abafatanyabikorwa, yasoje ku mugaragaro imurikabikorwa ryari rimaze iminsi itatu, rifite insanganyamatsiko igira iti: "Uruhare rw'abafatanyabikorwa b'Akarere ka Kirehe mu kwihutisha iterambere".

Ni imurikabikorwa ryari ryatangiye ku wa Kabiri tariki 19 Gicurasi 2026, yaberaga muri gare ya Nyakarambi, ryasojwe ryitabiriwe n'abamuritse bagera kuri 52, muri abo Abagize Ihuriro ry'Abafatanyabikorwa mu iterambere ry'Akarere ka Kirehe-JADF Kirehe ni Abafatanyabikorwa 40; Bamuritse ibirimo ibijyanye n’ubuhinzi n’ubworozi, serivisi zitangwa n’abafatanyabikorwa batandukanye, ibikorwa by’ubukorikori, ikoranabuhanga, uburezi, ubuzima n’ibindi bitandukanye.

Umuyobozi w’Ihuriro ry’abafatanyabikorwa mu iterambere ry’Akarere ka Kirehe- JADF Kirehe, Bwana Sebikwekwe Cyprien yavuze ko bishimira ko babonye umwanya wo guhurira hamwe bakereka abaturage ibyo bakora, ndetse nabo ubwabo bakungurana ubumenyi mu buryo banoza ibyo bakora.

Umuyobozi w’Akarere Bwana Rangira Bruno yashimiye abagize JADF-Kirehe ku bw’iri murikabikorwa, avuga ko ubufatanye butuma Ubuyobozi bukorana neza n’abafatanyabikorwa mu kugeza iterambere ku baturage; Abasaba ko ibyo bakora bigira impinduka nziza ku baturage kandi hakitabwa ku buryo biramba.

Mu gusoza iri murikabikorwa habayemo guhemba Abafatanyabikorwa bahize abandi mu bikorwa bamuritse muri iri murikabikorwa, ndetse n’abafatanyabikorwa bose bamuritse bahabwa ibyemezo by’uko bitabiriye.

Abafatanyabikorwa bibumbiye muri JADF Kirehe bose hamwe bagera kuri 78.